In nomine Domini Dei summi. Noverint fideles cuncti, presentes et futuri, quod ego Stephanus de Oblaco, peccatorum meorum pondus perpendens, et de his ęterni judicis discussionem pertimescens, ut aliquam requiem in die ultimi examinis inveniam, dono Deo et beatis apostolis Petro et Paulo Cluniacensique monasterio, cui preest pariter et prodest reverendus pater donnus Hugo, omnem hereditatem meam in pago Matisconensi, in villa Oblaco sitam, id est totius hereditatis partem quartam quę mihi obvenit hereditario jure, facta cum tribus fratribus meis divisione. Hanc ergo hereditatem cum omnibus ad ipsam pertinentibus, id est domibus, edificiis, vercariis, campis, silvis, vineis, pratis, pascuis, molendinis, aquis aquarumque decursibus, terris cultis et incultis, cum omni integritate, dono Deo et prefatis apostolis Petro et Paulo, pro anime meę et omnium parentum meorum, vivorum et defunctorum, et omnium christianorum remedio, ut partem et societatem mereamur habere in Dei regno, et rectores Cluniacensis monasterii eam teneant et jure perpetuo possideant, et quicquid voluerint ex ea faciant. Si quis autem hanc donacionem calumpniare voluerit, non vendicet quod requirit, sed omni maledictioni et perpetuę excommunicationi subjectus, Deum et beatos apostolos peccati sui ultores inveniat, nisi resipuerit. S. Stephani, qui hoc donum fecit. S. Willelmi archidiaconi, Milonis et Hugonis, fratrum ejus. S. Ansedei avunculi ejus. S. Gaufredi de Burzi, qui habet sororem ejus, et aliorum multorum.